ದರ ಅದೇ; ಎರಡು ದಿನದ ಹೋರಾಟ ತಂದದ್ದೇನು?

ಒಪ್ಪಿದ್ದ ನಿರ್ಧಾರ ಮರುಘೋಷಣೆಗೆ ಕಾರ್ಖಾನೆ ಆರಂಭ ವಿಳಂಬವೇಕೆ? |

ಪಡಸಲಗಿ–ಪೂಜಾರಿ ನಿಲುವಿನ ಬಗ್ಗೆ ಪ್ರಶ್ನೆ

ನವೆಂಬರ್‌ 5ರಂದು ಒಪ್ಪಿಕೊಂಡ ನಿರ್ಧಾರವನ್ನು 4ರಂದೇ ಜಾರಿಗೊಳಿಸಲು ಅಡ್ಡಿಯಾಗಿದ್ದೇನು? ಹೆಚ್ಚುವರಿ ದರ ಸಿಗದಿದ್ದರೆ ಎರಡು ದಿನಗಳ ವಿಳಂಬಕ್ಕೆ ಸಮರ್ಥನೆ ಏನು? ಕಬ್ಬು ಒಣಗುತ್ತಿರುವ ಹೊತ್ತಿನಲ್ಲಿ ಪ್ರತಿದಿನದ ವಿಳಂಬದ ಹೊರೆ ರೈತರ ಮೇಲೇ ಬೀಳುತ್ತದೆ. ಇದಕ್ಕೆ ಮುಖಂಡರು ಸ್ಪಷ್ಟ ಉತ್ತರ ನೀಡಬೇಕಾಗಿದೆ..

ಇ ಬೆಳಗಾವಿ ವಿಶ್ಲೇಷಣೆ ವರದಿ

ಬೆಳಗಾವಿ:

ಮಾತುಕತೆಯಲ್ಲಿ ಒಪ್ಪಿದ ದರ ಬದಲಾಗಲಿಲ್ಲ; ಆದರೆ, ಹೋರಾಟ ಮುಂದುವರಿಯಿತು. ಕೊನೆಗೆ ಅದೇ ನಿರ್ಧಾರ ಪ್ರಕಟಿಸುವುದಕ್ಕೆ ಎರಡು ದಿನ ಬೇಕಾಗಿದ್ದೇಕೆ? ಆ ವಿಳಂಬದಿಂದ ರೈತರಿಗೆ ಹೆಚ್ಚುವರಿಯಾಗಿ ಸಿಕ್ಕಿದ್ದೇನು?—ಕಬ್ಬು ದರ ಹೋರಾಟದ ಮುಖಂಡರಾದ ಶಶಿಕಾಂತ ಪಡಸಲಗಿ ಹಾಗೂ ಚುನ್ನಪ್ಪ ಪೂಜಾರಿ ಅವರ ನಿಲುವನ್ನು ಪ್ರಶ್ನಿಸಿರುವ ಹೇಳಿಕೆ, ಒಪ್ಪಂದ ಮತ್ತು ಅದರ ಅನುಷ್ಠಾನದ ನಡುವಿನ ಗೊಂದಲವನ್ನು ಮುಂದಿಟ್ಟಿದೆ.

ಹೊಲದಲ್ಲಿ ಕಬ್ಬು ಒಣಗುತ್ತಿರುವಾಗ ದರದ ಖಚಿತತೆ, ಕಟಾವು ಮತ್ತು ನುರಿಸುವಿಕೆ ಆರಂಭ ರೈತರ ತುರ್ತು ಅಗತ್ಯವಾಗಿತ್ತು. ಆದರೆ, ಮಾತುಕತೆಯಲ್ಲಿ ಮೂಡಿದ್ದ ಒಮ್ಮತವನ್ನು ಕಾರ್ಯರೂಪಕ್ಕೆ ತರುವ ಹಂತದಲ್ಲೇ ಮುಖಂಡರ ಪರಸ್ಪರ ವಿರುದ್ಧ ಹೇಳಿಕೆಗಳು ಅನಿಶ್ಚಿತತೆ ಹೆಚ್ಚಿಸಿದವು. ಒಬ್ಬರು ಹೋರಾಟ ಮುಗಿದಿದೆ ಎಂದಾಗ, ಮತ್ತೊಬ್ಬರು ಒಪ್ಪಂದಕ್ಕೆ ಸಹಿ ಮಾಡಿಸುವುದಾಗಿ ಹೇಳಿದ್ದು ರೈತರು ಯಾರ ಮಾತನ್ನು ನಂಬಬೇಕೆಂಬ ಪ್ರಶ್ನೆ ಹುಟ್ಟಿಸಿತು ಎಂದು ಹೇಳಿಕೆಯಲ್ಲಿ ಆರೋಪಿಸಲಾಗಿದೆ.

ಒಮ್ಮತದ ಬಳಿಕವೂ ಮುಂದುವರಿದದ್ದೇಕೆ?

ನವೆಂಬರ್‌ 3ರ ರಾತ್ರಿ ಜಿಲ್ಲಾ ಉಸ್ತುವಾರಿ ಸಚಿವರು ಹಾಗೂ ಜಿಲ್ಲಾಧಿಕಾರಿಗಳ ನೇತೃತ್ವದಲ್ಲಿ ನಡೆದ ಹಲವು ಸುತ್ತಿನ ಮಾತುಕತೆಯಲ್ಲಿ ರೈತ ಮುಖಂಡರು ಮತ್ತು ಕಾರ್ಖಾನೆ ಮಾಲೀಕರ ನಡುವೆ ದರದ ಕುರಿತು ಒಮ್ಮತ ಮೂಡಿತ್ತು. ಹೊಳೆಮ್ಮ ದೇವಸ್ಥಾನದಲ್ಲಿ ದರ ಪ್ರಕಟಿಸಿ, ಜಿಲ್ಲಾಡಳಿತದ ಸಮ್ಮುಖದಲ್ಲಿ ಒಪ್ಪಂದ ಮಾಡಿಕೊಳ್ಳಲು ತೀರ್ಮಾನಿಸಲಾಗಿತ್ತು ಎಂಬುದು ಹೇಳಿಕೆಯಲ್ಲಿನ ವಿವರಣೆ.

ಬೆಳಗಾವಿಯತ್ತ ಹೊರಟಿದ್ದ ಪಾದಯಾತ್ರೆ ಕೈಬಿಡುವ ನಿರ್ಧಾರವೂ ಆಗಿತ್ತು.

ಆದರೆ, ಮರುದಿನ ಬೆಳಿಗ್ಗೆ ಇಬ್ಬರು ಮುಖಂಡರ ನಡುವಿನ ಭಿನ್ನಾಭಿಪ್ರಾಯದಿಂದ ಹಿಂದಿನ ರಾತ್ರಿಯ ತೀರ್ಮಾನ ಪಾಲನೆಯಾಗಲಿಲ್ಲ ಎಂದು ಆರೋಪಿಸಲಾಗಿದೆ.

‘

ನವೆಂಬರ್‌ 3ರಂದು ಒಪ್ಪಿದ್ದ ದರವನ್ನೇ 4ರ ರಾತ್ರಿ ಪ್ರಕಟಿಸಿ, 5ರಂದು ಮತ್ತೆ ತಿಳಿಸಲಾಯಿತು. ಈ ನಡುವೆ ದರದಲ್ಲಿ ಬದಲಾವಣೆ ಆಗದಿದ್ದರೆ, ಹೋರಾಟ ಮುಂದುವರಿಸಲು ಕಾರಣವೇನು? ಹೆಚ್ಚುವರಿ ಫಲವೇನು?’ ಎಂದು ಪ್ರಶ್ನಿಸಲಾಗಿದೆ.

ಘೋಷಣೆ ಒಂದೇ; ಸಂದೇಶಗಳು ಬೇರೆ ಬೇರೆ

ಕಾರ್ಖಾನೆ ಮಾಲೀಕರೊಂದಿಗೆ ಒಪ್ಪಂದವಾಗಿದೆ ಎಂದು ಹೇಳುತ್ತಲೇ ಪಾದಯಾತ್ರೆ ಮುಂದುವರಿಸಿ, ನವೆಂಬರ್‌ 4ರ ರಾತ್ರಿ ಮುಕ್ತಿ ಮಠ ತಲುಪಲಾಯಿತು. ಅದೇ ರಾತ್ರಿ ಜಿಲ್ಲಾಡಳಿತ ದರ ಪ್ರಕಟಿಸಿ, ಪ್ರತಿಭಟನೆ ಹಿಂಪಡೆಯುವಂತೆ ಹಾಗೂ ಕಾರ್ಖಾನೆಗಳ ಕಾರ್ಯಾರಂಭಕ್ಕೆ ಅವಕಾಶ ನೀಡುವಂತೆ ಮನವಿ ಮಾಡಿತ್ತು ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ನವೆಂಬರ್‌ 5ರ ಸಂಜೆ ಚುನ್ನಪ್ಪ ಪೂಜಾರಿ ಅವರು ಒಪ್ಪಂದ ಪ್ರಕಟಿಸಿ, ಪ್ರತಿಭಟನೆ ಹಿಂಪಡೆಯುವುದಾಗಿ ಹಾಗೂ ಮರುದಿನದಿಂದ ಕಾರ್ಖಾನೆಗಳು ಆರಂಭವಾಗಲಿವೆ ಎಂದು ಘೋಷಿಸಿದರು. ಮತ್ತೊಂದೆಡೆ, ಶಶಿಕಾಂತ ಪಡಸಲಗಿ ಅವರು ಗುರ್ಲಾಪುರದಲ್ಲಿ ಜಿಲ್ಲಾಧಿಕಾರಿಗಳ ಸಮ್ಮುಖದಲ್ಲಿ ಕಾರ್ಖಾನೆ ಮಾಲೀಕರಿಂದ ಒಪ್ಪಂದಕ್ಕೆ ಸಹಿ ಹಾಕಿಸಲಾಗುವುದು ಎಂದು ಹೇಳಿದ್ದಕ್ಕೆ ಆಕ್ಷೇಪ ವ್ಯಕ್ತಪಡಿಸಲಾಗಿದೆ.

ದರದ ಘೋಷಣೆ, ಲಿಖಿತ ಒಪ್ಪಂದ ಮತ್ತು ಹೋರಾಟ ಹಿಂಪಡೆಯುವ ನಿರ್ಧಾರದ ನಡುವೆ ಯಾವ ಪ್ರಕ್ರಿಯೆ ಪೂರ್ಣಗೊಂಡಿದೆ, ಯಾವುದು ಬಾಕಿಯಿದೆ ಎಂಬುದನ್ನು ಮುಖಂಡರು ಸ್ಪಷ್ಟಪಡಿಸಬೇಕಿತ್ತು. ಅದರ ಬದಲು ವಿಭಿನ್ನ ಸಂದೇಶಗಳನ್ನು ನೀಡಿದ್ದು ಗೊಂದಲಕ್ಕೆ ಕಾರಣವಾಯಿತು ಎಂದು ಟೀಕಿಸಲಾಗಿದೆ.

ಕರೆ ಮುಖಂಡರದ್ದು; ಪ್ರಕರಣಗಳ ಹೊರೆ ಯಾರದ್ದು?

ಸಾರ್ವಜನಿಕರಿಗೆ ತೊಂದರೆ ಹಾಗೂ ಕಾನೂನು ಸುವ್ಯವಸ್ಥೆಯ ಸಮಸ್ಯೆ ಉಂಟಾಗಬಹುದೆಂಬ ಕಾರಣಕ್ಕೆ ನಗರ ವ್ಯಾಪ್ತಿಯಲ್ಲಿ ನಿಷೇಧಾಜ್ಞೆ ವಿಧಿಸಲಾಗಿತ್ತು. ನವೆಂಬರ್‌ 5ರಂದು ಕೆಲವು ಮುಖಂಡರನ್ನು ಮುನ್ನೆಚ್ಚರಿಕಾ ಕ್ರಮವಾಗಿ ವಶಕ್ಕೆ ಪಡೆಯಲಾಯಿತು ಎಂದು ಹೇಳಿಕೆಯಲ್ಲಿ ವಿವರಿಸಲಾಗಿದೆ.

ಈ ಸಂದರ್ಭದಲ್ಲಿಯೂ ಒಬ್ಬ ಮುಖಂಡರು ನಗರಕ್ಕೆ ಬರಬೇಡಿ ಎಂದು ಮನವಿ ಮಾಡಿದರೆ, ಮತ್ತೊಬ್ಬರು ಹೆಚ್ಚಿನ ಸಂಖ್ಯೆಯಲ್ಲಿ ಸೇರಬೇಕೆಂದು ಕರೆ ನೀಡಿದರು ಎಂಬ ಆರೋಪ ಮಾಡಲಾಗಿದೆ.

‘ರೈತರಿಗೆ ನೀಡಬೇಕಿರುವುದು ಸ್ಪಷ್ಟ ಮಾರ್ಗದರ್ಶನ. ವಿರುದ್ಧ ಕರೆಗಳಿಂದ ಅವರು ಗೊಂದಲಕ್ಕೆ ಸಿಲುಕಿ, ಪ್ರಕರಣಗಳನ್ನು ಎದುರಿಸುವಂತಾದರೆ ಅದರ ಜವಾಬ್ದಾರಿ ಯಾರು ಹೊರುತ್ತಾರೆ? ನಿರ್ಧಾರ ಪ್ರಕಟಿಸುವಷ್ಟೇ ಅದಕ್ಕೆ ಬದ್ಧರಾಗುವುದೂ ನಾಯಕತ್ವದ ಹೊಣೆಗಾರಿಕೆ’ ಎಂದು ಹೇಳಿಕೆಯಲ್ಲಿ ಪ್ರಶ್ನಿಸಲಾಗಿದೆ.

ಹೆಚ್ಚಿನ ದರದ ಭರವಸೆಗೆ ಲೆಕ್ಕ ಕೊಡಿ

₹4,500 ಅಥವಾ ₹5,500 ದರದ ಬಗ್ಗೆ ಹೇಳಿಕೆ ನೀಡುವ ಮುಖಂಡರು, ಆ ಮೊತ್ತ ರೈತರಿಗೆ ಯಾವ ಆಧಾರದಲ್ಲಿ ಸಿಗಲಿದೆ ಎಂಬುದನ್ನು ವಿವರಿಸಬೇಕು. ಯಾರು ಪಾವತಿಸುತ್ತಾರೆ, ಯಾವಾಗ ಪಾವತಿಸುತ್ತಾರೆ ಮತ್ತು ಅದಕ್ಕೆ ಇರುವ ಖಚಿತತೆ ಏನು ಎಂಬ ಪ್ರಶ್ನೆಗಳಿಗೆ ಉತ್ತರ ನೀಡಬೇಕು ಎಂದು ಒತ್ತಾಯಿಸಲಾಗಿದೆ.

ಸಂಕಷ್ಟದಲ್ಲಿರುವ ರೈತರಿಗೆ ಹೆಚ್ಚಿನ ದರದ ನಿರೀಕ್ಷೆ ಮೂಡಿಸುವಾಗ, ಅದನ್ನು ಪಡೆಯುವ ಮಾರ್ಗವನ್ನೂ ತಿಳಿಸಬೇಕು. ಖಚಿತತೆ ಇಲ್ಲದ ಭರವಸೆಗಳು ಕಟಾವು ಮತ್ತು ಕಬ್ಬು ಪೂರೈಕೆಯ ನಿರ್ಧಾರಗಳನ್ನು ಮತ್ತಷ್ಟು ಸಂಕೀರ್ಣಗೊಳಿಸಬಾರದು ಎಂದು ಹೇಳಿಕೆಯಲ್ಲಿ ಆಗ್ರಹಿಸಲಾಗಿದೆ.

ರಾಜ್ಯ ಸಲಹಾ ದರ ಹಾಗೂ ಸಕ್ಕರೆಯ ಕನಿಷ್ಠ ಮಾರಾಟ ದರದ ಬೇಡಿಕೆಗಳನ್ನು ಪ್ರತ್ಯೇಕವಾಗಿ ಚರ್ಚಿಸಲು ಹಿಂದೆ ಒಪ್ಪಿಕೊಳ್ಳಲಾಗಿತ್ತು. ಹಾಗಿದ್ದರೂ ಅವುಗಳನ್ನು ಮತ್ತೆ ಮುಂದಿಟ್ಟು, ಒಮ್ಮತ ಮೂಡಿದ್ದ ನಿರ್ಧಾರದ ಅನುಷ್ಠಾನ ವಿಳಂಬಗೊಳಿಸಿದ್ದೇಕೆ ಎಂದೂ ಪ್ರಶ್ನಿಸಲಾಗಿದೆ.

‘