;
top of page

ಹಾಲು ಪೂರೈಸಿದ ಕೈಗಳಿಗೆ ಲಾಭದ ಉಡುಗೊರೆ.

Writer: vilas joshi
vilas joshi
11 minutes ago
1 min read

ಒಕ್ಕೂಟದ ಲಾಭದಲ್ಲಿ ಹೈನುಗಾರರಿಗೂ ಪಾಲು


₹2.40 ಕೋಟಿ ವೆಚ್ಚದ ಸಲಕರಣೆ ವಿತರಣೆ;


ನಂದಿನಿ ದರ ಏರಿಕೆಯನ್ನು ಸಮರ್ಥಿಸಿಕೊಂಡ ಬಾಲಚಂದ್ರ ಜಾರಕಿಹೊಳಿ.


ಬೆಳಗಾವಿ:

ಹಾಲು ಪೂರೈಸುವ ರೈತರ ಪರಿಶ್ರಮದಿಂದ ಒಕ್ಕೂಟಕ್ಕೆ ಬಂದ ಲಾಭದ ಪ್ರಯೋಜನವನ್ನು ಅವರಿಗೇ ತಲುಪಿಸಲು ಬೆಳಗಾವಿ ಜಿಲ್ಲಾ ಹಾಲು ಒಕ್ಕೂಟ ಮುಂದಾಗಿದೆ. ಹಾಲು ಉತ್ಪಾದಕ ಸದಸ್ಯರಿಗೆ ಶೇ 60ರಷ್ಟು ಅನುದಾನದಲ್ಲಿ ₹2.40 ಕೋಟಿ ವೆಚ್ಚದ ಯಂತ್ರೋಪಕರಣ ಹಾಗೂ ರಬ್ಬರ್ ಮ್ಯಾಟ್‌ಗಳನ್ನು ವಿತರಿಸಲಾಗುತ್ತಿದೆ.

ನಗರದ ಮಹಾಂತೇಶ ನಗರದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಸಲಕರಣೆ ವಿತರಿಸಿ ಮಾತನಾಡಿದ ಒಕ್ಕೂಟದ ಅಧ್ಯಕ್ಷ, ಅರಭಾವಿ ಶಾಸಕ ಬಾಲಚಂದ್ರ ಜಾರಕಿಹೊಳಿ, ‘ಹೈನುಗಾರರಿಗೆ ಒಕ್ಕೂಟದ ಲಾಭಾಂಶದಿಂದ ನೀಡುತ್ತಿರುವ ದೀಪಾವಳಿ ಕೊಡುಗೆ ಇದು’ ಎಂದು ಹೇಳಿದರು.



ಒಕ್ಕೂಟದ ಅನುದಾನದಲ್ಲಿ 100 ಸದಸ್ಯರಿಗೆ ₹13.47 ಲಕ್ಷ ವೆಚ್ಚದ ವಿದ್ಯುತ್ ಚಾಲಿತ ಹಾಲು ಕರೆಯುವ ಯಂತ್ರಗಳನ್ನು ನೀಡಲಾಗಿದೆ. ಇನ್ನೂ 100 ಸದಸ್ಯರಿಗೆ ₹16 ಲಕ್ಷ ವೆಚ್ಚದ 2 ಎಚ್‌ಪಿ ವಿದ್ಯುತ್ ಚಾಲಿತ ಮೇವು ಕತ್ತರಿಸುವ ಯಂತ್ರ ಹಾಗೂ 300 ಫಲಾನುಭವಿಗಳಿಗೆ ₹85.71 ಲಕ್ಷ ವೆಚ್ಚದ 5 ಎಚ್‌ಪಿ ಡೀಸೆಲ್ ಚಾಲಿತ ಮೇವು ಕತ್ತರಿಸುವ ಯಂತ್ರಗಳನ್ನು ವಿತರಿಸಲಾಗಿದೆ. ಇದರ ಜತೆಗೆ ₹1.25 ಕೋಟಿ ವೆಚ್ಚದ 10 ಸಾವಿರ ರಬ್ಬರ್ ಮ್ಯಾಟ್‌ಗಳನ್ನು ರೈತರಿಗೆ ಒದಗಿಸಲಾಗಿದೆ ಎಂದು ಅವರು ವಿವರಿಸಿದರು.



ಜಿಲ್ಲೆಯಲ್ಲಿ 664 ಹಾಲು ಉತ್ಪಾದಕರ ಸಹಕಾರ ಸಂಘಗಳು ಕಾರ್ಯನಿರ್ವಹಿಸುತ್ತಿವೆ. ಅವುಗಳ ಮೂಲಕ ಪ್ರತಿದಿನ ಸರಾಸರಿ 3.20 ಲಕ್ಷ ಲೀಟರ್ ಹಾಲು ಸಂಗ್ರಹವಾಗುತ್ತಿದೆ. ಈ ಪೈಕಿ ಸುಮಾರು 2.45 ಲಕ್ಷ ಲೀಟರ್ ಆಕಳು ಹಾಲು ಹಾಗೂ 71 ಸಾವಿರ ಲೀಟರ್‌ಗೂ ಹೆಚ್ಚು ಎಮ್ಮೆ ಹಾಲು ಸೇರಿದೆ ಎಂದು ತಿಳಿಸಿದರು.

ನವೆಂಬರ್ 1ರಿಂದ ನಂದಿನಿ ಹಾಲು, ಮೊಸರು, ಮಜ್ಜಿಗೆ ಮತ್ತು ಲಸ್ಸಿ ದರ ಹೆಚ್ಚಿಸಿರುವ ಕುರಿತು ಮಾತನಾಡಿದ ಬಾಲಚಂದ್ರ, ಮಳೆಯ ಅಭಾವದಿಂದ ಮೇವು ಮತ್ತು ಪಶು ಆಹಾರದ ಕೊರತೆ ಉಂಟಾಗಿ ಹೈನುಗಾರರ ಉತ್ಪಾದನಾ ವೆಚ್ಚ ಏರಿದೆ ಎಂದರು.


‘

ರೈತರ ಜೀವನೋಪಾಯವನ್ನು ಸುಸ್ಥಿರಗೊಳಿಸಲು ಹಾಗೂ ಹಾಲು ಉತ್ಪಾದನೆ ಮುಂದುವರಿಯಲು ದರ ಪರಿಷ್ಕರಣೆ ಅನಿವಾರ್ಯವಾಗಿತ್ತು. ಗ್ರಾಹಕರಿಗೆ ಕಲಬೆರಕೆ ರಹಿತ, ಗುಣಮಟ್ಟದ ಹಾಲು ಪೂರೈಸಲು ಒಕ್ಕೂಟ ಬದ್ಧವಾಗಿದೆ’ ಎಂದು ಹೇಳಿದರು.

‘ನಂದಿನಿ ಕೇವಲ ಹಾಲಿನ ಬ್ರ್ಯಾಂಡ್ ಅಲ್ಲ; ಲಕ್ಷಾಂತರ ಹೈನುಗಾರರ ಬದುಕಿನ ಆಧಾರ. ರೈತರ ಹಿತವೇ ನಂದಿನಿಯ ಹಿತ. ಗ್ರಾಹಕರ ವಿಶ್ವಾಸವೇ ಅದರ ಶಕ್ತಿ’ ಎಂದರು.

ಕಾರ್ಯಕ್ರಮದಲ್ಲಿ ಒಕ್ಕೂಟದ ನಿರ್ದೇಶಕರು, ಅಧಿಕಾರಿಗಳು ಹಾಗೂ ಹೈನುಗಾರರು ಉಪಸ್ಥಿತರಿದ್ದರು.

 
 
 

Comments


bottom of page