ಬೆಳಗಾವಿಯಲ್ಲಿ ರಸ್ತೆಯೇ ಬಂದ್‌: ಪಾಲಿಕೆಯ ಕಾವಲು ಎಲ್ಲಿದೆ?

ನಕ್ಷೆಯಲ್ಲಿ ರಸ್ತೆ; ಸ್ಥಳದಲ್ಲಿ ತಡೆಗೋಡೆ!

ಐದು ದಶಕಗಳ ಸಂಚಾರಕ್ಕೆ ದಿಢೀರ್‌ ತಡೆ

ರಸ್ತೆ ಮುಚ್ಚುವಾಗ ಪಾಲಿಕೆ ಎಲ್ಲಿತ್ತು?

ಸಾರ್ವಜನಿಕ ರಸ್ತೆಯನ್ನೇ ಮುಚ್ಚಿದರೆ, ಖಾಲಿ ಜಾಗಗಳಿಗೆ ರಕ್ಷಣೆ ಹೇಗೆ?.

ದೂರು ಸ್ವೀಕಾರ ಆಯಿತು; ಕ್ರಮ ಯಾವಾಗ?

ದಾಖಲೆ ಪರಿಶೀಲನೆಗೆ ಎಷ್ಟು ದಿನ ಬೇಕು?

ಜನರೇ ಕಾವಲು ಕಾಯಬೇಕಾದರೆ ಪಾಲಿಕೆಯ ಪಾತ್ರವೇನು?

ಭರವಸೆ ಸಾಕು; ರಸ್ತೆಯ ಸ್ಥಿತಿ ಸ್ಪಷ್ಟಪಡಿಸಿ

ಬೆಳಗಾವಿಯಲ್ಲಿ ನಕಲಿ ದಾಖಲೆ ಸೃಷ್ಟಿಸಿ ಭೂ ಕಬಳಿಕೆ ನಡೆಸಿರುವ ಆರೋಪಗಳ ಬೆನ್ನಲ್ಲೇ, ಈಗ ಜನರು ಓಡಾಡುತ್ತಿದ್ದ ರಸ್ತೆಯನ್ನೇ ಮುಚ್ಚಿರುವ ಆರೋಪ ಕೇಳಿಬಂದಿದೆ. ರಸ್ತೆಯ ರಕ್ಷಣೆಗೇ ಜನರು ದೂರು ಹಿಡಿದು ಪಾಲಿಕೆಗೆ ಹೋಗಬೇಕಾದರೆ, ಖಾಲಿ ಜಾಗಗಳ ಸುರಕ್ಷತೆ ಬಗ್ಗೆ ಅವರಿಗೆ ಭರವಸೆ ಬರುವುದಾದರೂ ಹೇಗೆ?

ಹನುಮಾನ ನಗರ ಸರ್ಕಲ್‌ನ ಉತ್ತರಕ್ಕೆ, ಹನುಮಾನ ಟವರ್‌ನ ಪಶ್ಚಿಮ ಭಾಗದಲ್ಲಿರುವ ಸುಮಾರು 40 ಅಡಿ ಅಗಲದ ರಸ್ತೆಯನ್ನು ನವಾಸಾ ಎಸ್ಟೇಟ್ಸ್ ಎಲ್‌ಎಲ್‌ಪಿ ಸಂಸ್ಥೆ ತಡೆಗೋಡೆ ಹಾಕಿ ಮುಚ್ಚಿದೆ ಎಂದು ಬಡಾವಣೆಯ ನಿವಾಸಿಗಳು ದೂರಿದ್ದಾರೆ.

ಅಕ್ಟೋಬರ್‌ 7ರಂದು ಬೆಳಿಗ್ಗೆ ಸುಮಾರು 6ಕ್ಕೆ ಉಕ್ಕಿನ ಫಲಕಗಳನ್ನು ಅಳವಡಿಸಿ, ಸಾರ್ವಜನಿಕ ಬಳಕೆಯನ್ನು ನಿರ್ಬಂಧಿಸುವ ಫಲಕ ಹಾಕಲಾಗಿದೆ ಎಂಬುದು ಅವರ ಆರೋಪ.

ನಿವಾಸಿಗಳ ಪ್ರಕಾರ, ಈ ರಸ್ತೆ 1975–76ರಿಂದ ಬಳಕೆಯಲ್ಲಿದೆ. ಅನುಮೋದಿತ ಬಡಾವಣೆ ನಕ್ಷೆ ಹಾಗೂ ನಗರಾಭಿವೃದ್ಧಿ ಪ್ರಾಧಿಕಾರದ ಮಾಸ್ಟರ್‌ ಪ್ಲಾನ್‌ನಲ್ಲಿಯೂ ರಸ್ತೆ ಇದೆ. ಹಾಗಿದ್ದರೆ, ನಕ್ಷೆಯಲ್ಲಿರುವ ರಸ್ತೆ ಸ್ಥಳದಲ್ಲಿ ಮುಚ್ಚಿದ್ದು ಹೇಗೆ? ಪಾಲಿಕೆಯ ಅನುಮತಿ ಇದೆಯೇ?

ಇದನ್ನು ದಾಖಲೆ ಪರಿಶೀಲನೆಯಿಂದ ಸ್ಪಷ್ಟಪಡಿಸಬೇಕಿದೆ. ಆದರೆ ಜನರ ಸಂಚಾರಕ್ಕೆ ಅಡ್ಡಿಯಾದಾಗ ಸ್ಥಳ ಪರಿಶೀಲನೆ ನಡೆಸುವುದು, ರಸ್ತೆಯ ಸ್ಥಿತಿಯನ್ನು ದಾಖಲಿಸುವುದು ಹಾಗೂ ಸಂಬಂಧಪಟ್ಟವರಿಂದ ದಾಖಲೆ ಕೇಳುವುದು ಪಾಲಿಕೆಯ ತಕ್ಷಣದ ಹೊಣೆಗಾರಿಕೆ ಅಲ್ಲವೇ?

ಉಪ ಆಯುಕ್ತೆ ಲಕ್ಷ್ಮೀ ನಿಪ್ಪಾಣಿಕರ ಅವರು ದೂರು ಸ್ವೀಕರಿಸಿ, ದಾಖಲೆ ಪರಿಶೀಲಿಸಿ ಕ್ರಮ ಕೈಗೊಳ್ಳುವ ಭರವಸೆ ನೀಡಿದ್ದಾರೆ. ಈಗ ಮುಖ್ಯವಾಗಿರುವುದು ಆ ಭರವಸೆ ಕಾರ್ಯರೂಪಕ್ಕೆ ಬರುವುದು. ಪರಿಶೀಲನೆ ಯಾವಾಗ ಮುಗಿಯುತ್ತದೆ? ರಸ್ತೆ ಸಾರ್ವಜನಿಕದ್ದಾಗಿದ್ದರೆ ತಡೆಗೋಡೆ ಯಾವಾಗ ತೆರವಾಗುತ್ತದೆ? ಈ ಪ್ರಶ್ನೆಗಳಿಗೆ ಜನರಿಗೆ ಸ್ಪಷ್ಟ ಉತ್ತರ ಬೇಕಿದೆ.

ಸಂಸ್ಥೆಯ ವಾದವೂ ಪರಿಶೀಲನೆಗೆ ಒಳಪಡಬೇಕು. ಆದರೆ ಅರ್ಧ ಶತಮಾನದಿಂದ ಬಳಕೆಯಲ್ಲಿದೆ ಎನ್ನಲಾದ ಮಾರ್ಗವನ್ನು ಮುಚ್ಚಿದ ಆರೋಪವನ್ನು ಸಾಮಾನ್ಯ ಮನವಿಯಂತೆ ಬದಿಗಿಡಲಾಗದು.

ಸಾರ್ವಜನಿಕ ಆಸ್ತಿಯ ಕಾವಲುಗಾರ ಪಾಲಿಕೆ. ಜನರೇ ಅತಿಕ್ರಮಣ ಪತ್ತೆಹಚ್ಚಿ, ದೂರು ನೀಡಿ, ಕ್ರಮಕ್ಕಾಗಿ ಅಲೆದಾಡಬೇಕಾದರೆ—ಪಾಲಿಕೆಯ ಮೇಲ್ವಿಚಾರಣೆ ಕೆಲಸ ಮಾಡುತ್ತಿರುವುದು ಎಲ್ಲಿ?