ಯುಜಿಡಿ ಸಹಾಯಕರ ಆಯ್ಕೆ: ನಕಲಿ ಪಿಎಫ್‌, ಸೇವಾ ಪ್ರಮಾಣಪತ್ರ ಸಲ್ಲಿಕೆ ಆರೋಪ

ಎರಡು ವರ್ಷದ ಅನುಭವದ ಷರತ್ತು ಉಲ್ಲಂಘನೆ ದೂರು |

29 ಮಂದಿಯ ತಾತ್ಕಾಲಿಕ ಪಟ್ಟಿಗೆ ಆಕ್ಷೇಪ | ಮೂಲ ದಾಖಲೆಗಳ ತನಿಖೆಗೆ ಆಗ್ರಹ

ಬೆಳಗಾವಿ —

ಮಹಾನಗರ ಪಾಲಿಕೆಯ ಒಳಚರಂಡಿ ಸಹಾಯಕರ ನೇಮಕಾತಿಗೆ ಸಲ್ಲಿಸಿದ ಕೆಲ ಅರ್ಜಿಗಳಿಗೆ ನಕಲಿ ಭವಿಷ್ಯ ನಿಧಿ (ಪಿಎಫ್‌) ದಾಖಲೆಗಳು ಮತ್ತು ಸೇವಾ ಪ್ರಮಾಣಪತ್ರಗಳನ್ನು ಲಗತ್ತಿಸಲಾಗಿದೆ ಎಂದು ತಾತ್ಕಾಲಿಕ ಆಯ್ಕೆ ಪಟ್ಟಿಯಲ್ಲಿ ಸ್ಥಾನ ಪಡೆಯದ ಅಭ್ಯರ್ಥಿಗಳು ಆರೋಪಿಸಿದ್ದಾರೆ. ಕನಿಷ್ಠ ಎರಡು ವರ್ಷದ ಸೇವಾನುಭವದ ಷರತ್ತು ಪೂರೈಸದ ಕೆಲವರನ್ನೂ ಅರ್ಹರೆಂದು ಪರಿಗಣಿಸಲಾಗಿದೆ ಎಂಬುದು ಅವರ ದೂರು.

138 ಪೌರಕಾರ್ಮಿಕರ ನೇಮಕಾತಿ ವಿವಾದ ಇನ್ನೂ ಚರ್ಚೆಯಲ್ಲಿರುವಾಗಲೇ, 29 ಒಳಚರಂಡಿ ಸಹಾಯಕರ ತಾತ್ಕಾಲಿಕ ಆಯ್ಕೆ ಪಟ್ಟಿಯೂ ಪ್ರಶ್ನೆಗೆ ಸಿಲುಕಿದೆ. ನಕಲಿ ಎಂದು ದೂರಲಾಗಿರುವ ದಾಖಲೆಗಳಿಗೆ ಪಾಲಿಕೆಯ ಕೆಲ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್‌ಗಳು (ಎಇಇ) ಅನುಮೋದನೆ ನೀಡಿದ್ದಾರೆ ಎಂದೂ ಅಭ್ಯರ್ಥಿಗಳು ಆರೋಪಿಸಿದ್ದಾರೆ.

ಪ್ರಮಾಣಪತ್ರದಲ್ಲಿರುವ ಸೇವಾವಧಿಗೆ ಪಿಎಫ್‌ ದಾಖಲೆ ತಾಳೆಯಾಗುತ್ತದೆಯೇ?

ಸೇವಾ ಪ್ರಮಾಣಪತ್ರದಲ್ಲಿ ನಮೂದಿಸಿರುವ ಅವಧಿಯನ್ನು ಮೂಲ ಹಾಜರಾತಿ, ವೇತನ ಪಾವತಿ ಮತ್ತು ಪಿಎಫ್‌ ವಂತಿಗೆ ದಾಖಲೆಗಳೊಂದಿಗೆ ಹೋಲಿಸಿ ಪರಿಶೀಲಿಸಬೇಕು ಎಂದು ಅಭ್ಯರ್ಥಿಗಳು ಒತ್ತಾಯಿಸಿದ್ದಾರೆ. ಎರಡು ವರ್ಷದ ಸೇವಾನುಭವವನ್ನು ಯಾವ ದಾಖಲೆ ಆಧರಿಸಿ ದೃಢಪಡಿಸಲಾಯಿತು? ಅನುಮೋದನೆ ನೀಡಿದ ಅಧಿಕಾರಿಗಳು ಮೂಲ ದಾಖಲೆಗಳನ್ನು ಪರಿಶೀಲಿಸಿದ್ದರೇ? ಎಂಬ ಪ್ರಶ್ನೆಗಳನ್ನೂ ಅವರು ಮುಂದಿಟ್ಟಿದ್ದಾರೆ.

45 ಹುದ್ದೆಗಳಿಗೆ 29 ಮಂದಿಯ ತಾತ್ಕಾಲಿಕ ಪಟ್ಟಿ

ಪೌರಾಡಳಿತ ನಿರ್ದೇಶನಾಲಯವು ಬೆಳಗಾವಿ ಪಾಲಿಕೆಗೆ 45 ಒಳಚರಂಡಿ ಸಹಾಯಕ ಹುದ್ದೆಗಳನ್ನು ಹಂಚಿಕೆ ಮಾಡಿತ್ತು. ಸೆಪ್ಟೆಂಬರ್‌ 30ರ ಗಡುವಿನೊಳಗೆ 50 ಅರ್ಜಿಗಳು ಬಂದಿದ್ದವು. ಬಳಿಕ ಇನ್ನೂ ಮೂರು ಅರ್ಜಿಗಳು ಸ್ವೀಕೃತವಾಗಿದ್ದವು. ಒಟ್ಟು 53 ಅರ್ಜಿಗಳ ಪೈಕಿ 34 ಅಭ್ಯರ್ಥಿಗಳನ್ನು ಅರ್ಹರೆಂದು ಗುರುತಿಸಲಾಗಿತ್ತು ಎಂದು ಪಾಲಿಕೆಯ ಪ್ರಕಟಣೆ ತಿಳಿಸಿದೆ.

ಸೇವಾವಧಿ, ವಯಸ್ಸಿನ ಜ್ಯೇಷ್ಠತೆ ಮತ್ತು ಮೀಸಲಾತಿ ನಿಯಮಗಳನ್ನು ಪರಿಗಣಿಸಿ ಸಿದ್ಧಪಡಿಸಿದ 29 ಮಂದಿಯ ತಾತ್ಕಾಲಿಕ ಪಟ್ಟಿಗೆ ನೇಮಕಾತಿ ಸಮಿತಿ ಅಕ್ಟೋಬರ್‌ 22ರಂದು ಅನುಮೋದನೆ ನೀಡಿತ್ತು. 16 ಮೀಸಲು ಬಿಂದುಗಳು ಖಾಲಿ ಉಳಿದಿದ್ದವು. ಆಕ್ಷೇಪಣೆ ಸಲ್ಲಿಸಲು ಅಕ್ಟೋಬರ್‌ 28ರ ಸಂಜೆ 5.30ರವರೆಗೆ ಅವಕಾಶ ನೀಡಲಾಗಿತ್ತು.

ಆಯುಕ್ತರು, ಇಬ್ಬರು ಶಾಸಕರ ಗಮನಕ್ಕೆ ದೂರು

ದೂರನ್ನು ಪಾಲಿಕೆ ಆಯುಕ್ತರು ಹಾಗೂ ನಗರದ ಇಬ್ಬರು ಶಾಸಕರ ಗಮನಕ್ಕೆ ತರಲಾಗಿದೆ ಎಂದು ಅಭ್ಯರ್ಥಿಗಳು ತಿಳಿಸಿದ್ದಾರೆ.

ಕೆಲವರು ಲೋಕಾಯುಕ್ತ ಕಚೇರಿಗೆ ದೂರು ಸಲ್ಲಿಸುವ ಚಿಂತನೆಯಲ್ಲಿದ್ದಾರೆ. ಅರ್ಜಿ ಪರಿಶೀಲನೆಯಿಂದ ತಾತ್ಕಾಲಿಕ ಪಟ್ಟಿ ಸಿದ್ಧಪಡಿಸುವವರೆಗಿನ ಪ್ರಕ್ರಿಯೆಯನ್ನು ಸಮಗ್ರ ತನಿಖೆಗೆ ಒಳಪಡಿಸಬೇಕು. ಅಕ್ರಮ ದೃಢಪಟ್ಟರೆ ದಾಖಲೆಗಳಿಗೆ ಅನುಮೋದನೆ ನೀಡಿದವರು ಮತ್ತು ಅವುಗಳ ಆಧಾರದಲ್ಲಿ ಅಭ್ಯರ್ಥಿಗಳ ಹೆಸರನ್ನು ಪಟ್ಟಿಗೆ ಸೇರಿಸಿದವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಅವರು ಆಗ್ರಹಿಸಿದ್ದಾರೆ.