ಮುಸ್ಲಿಮರು ಬೇಡ ಎನ್ನುವವನು ಹಿಂದುವಾಗಿ ಉಳಿಯಲಾರ’

ನ್ಯೂಯಾರ್ಕ್‌ನಲ್ಲಿ ಮೋಹನ್ ಭಾಗವತ್ ವೈವಿಧ್ಯದಲ್ಲಿನ ಏಕತೆಯೇ ಭಾರತದ ಡಿಎನ್‌ಎ

ನ್ಯೂಯಾರ್ಕ್:

‘ಭಾರತದಲ್ಲಿ ಮುಸ್ಲಿಮರು ಇರಬಾರದು ಎಂದು ಯಾವುದೇ ಹಿಂದೂ ಭಾವಿಸಿದರೆ, ಆತ ಹಿಂದುವಾಗಿ ಉಳಿಯಲಾರ’ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಸಂಘಚಾಲಕ ಮೋಹನ್ ಭಾಗವತ್ ಹೇಳಿದರು.

ಮ್ಯಾಡಿಸನ್ ಸ್ಕ್ವೇರ್ ಗಾರ್ಡನ್‌ನಲ್ಲಿ ಶನಿವಾರ ನಡೆದ ‘ಯುನಿವರ್ಸಲ್ ಒನ್‌ನೆಸ್ ಸೆಲೆಬ್ರೇಷನ್’ ಹಾಗೂ ಧಾರ್ಮಿಕ ಮುಖಂಡರ ಸಮಾವೇಶದಲ್ಲಿ ಮಾತನಾಡಿದ ಅವರು, ಧರ್ಮ ಮತ್ತು ಆರಾಧನೆಯ ಮಾರ್ಗಗಳು ಬೇರೆಬೇರೆಯಾಗಿದ್ದರೂ ಮಾನವೀಯತೆ ಒಂದೇ ಎಂದು ಪ್ರತಿಪಾದಿಸಿದರು.

ಸುಮಾರು 5 ಸಾವಿರ ಭಾರತೀಯ–ಅಮೆರಿಕನ್ನರು ಪಾಲ್ಗೊಂಡಿದ್ದ ಕಾರ್ಯಕ್ರಮದಲ್ಲಿ, ಭಾರತವು ಸಹಬಾಳ್ವೆಯನ್ನು ಜಗತ್ತಿಗೆ ಆಚರಣೆಯ ಮೂಲಕ ತೋರಿಸಬೇಕಿದೆ ಎಂದರು.

‘ವೈವಿಧ್ಯದಲ್ಲಿನ ಏಕತೆ ಭಾರತದ ಡಿಎನ್‌ಎಯಲ್ಲಿದೆ. ಭಿನ್ನತೆಗಳು ನಮ್ಮ ಏಕತೆಯನ್ನು ಮತ್ತಷ್ಟು ಅಲಂಕರಿಸುತ್ತವೆ. ಎಲ್ಲ ಧರ್ಮಗಳೂ ಅಂತಿಮವಾಗಿ ಒಂದೇ ಸತ್ಯದ ಅನ್ವೇಷಣೆಯತ್ತ ಸಾಗುತ್ತವೆ’ ಎಂದು ಹೇಳಿದರು.

ಅಮೆರಿಕವನ್ನು ಕರ್ಮಭೂಮಿಯನ್ನಾಗಿ ಮಾಡಿಕೊಂಡಿರುವ ಭಾರತೀಯರು ಆ ದೇಶಕ್ಕೆ ನಿಷ್ಠರಾಗಿರಬೇಕು. ಅದೇ ವೇಳೆ, ಜನ್ಮಭೂಮಿಯಾದ ಭಾರತದ ಸಂಸ್ಕೃತಿ ಮತ್ತು ಮೌಲ್ಯಗಳೊಂದಿಗಿನ ಸಂಬಂಧವನ್ನೂ ಉಳಿಸಿಕೊಳ್ಳಬೇಕು ಎಂದು ಕರೆ ನೀಡಿದರು. ಭೌತಿಕ ಸಾಧನೆಯೊಂದೇ ಜೀವನಕ್ಕೆ ತೃಪ್ತಿ ನೀಡುವುದಿಲ್ಲ; ಸಮಾಜದ ಬಗೆಗಿನ ಕರ್ತವ್ಯವೇ ಧರ್ಮದ ನಿಜವಾದ ಅರ್ಥ ಎಂದರು.

ರಾಜಕೀಯವು ಸ್ವಹಿತಾಸಕ್ತಿಯ ಆಟವಾಗಿ ಬದಲಾಗುತ್ತಿದೆ ಎಂದು ಅಭಿಪ್ರಾಯಪಟ್ಟ ಅವರು, ಶಾಶ್ವತ ಬದಲಾವಣೆ ರಾಜಕೀಯದಿಂದಲ್ಲ, ಸಮಾಜದ ಒಳಗಿನಿಂದ ಆರಂಭವಾಗಬೇಕು ಎಂದರು.

ಭಾಗವತ್ ಅವರ ಕಾರ್ಯಕ್ರಮಕ್ಕೆ ನ್ಯೂಯಾರ್ಕ್ ಮೇಯರ್ ಜೊಹ್ರಾನ್ ಮಮ್ದಾನಿ ಸೇರಿದಂತೆ ಕೆಲವು ಸಂಘಟನೆಗಳು ವಿರೋಧ ವ್ಯಕ್ತಪಡಿಸಿದ್ದವು. ಆರ್‌ಎಸ್‌ಎಸ್ ವಿರುದ್ಧ ಧಾರ್ಮಿಕ ಅಸಹಿಷ್ಣುತೆಯ ಆರೋಪ ಮಾಡಿದ್ದರೆ, ಸಂಘವು ಅದನ್ನು ನಿರಾಕರಿಸಿದೆ. ಈ ವಿರೋಧದ ನಡುವೆಯೇ ಭಾಗವತ್ ನೀಡಿದ ‘ಸಹಬಾಳ್ವೆಯ ಸಂದೇಶ’ ಜಾಗತಿಕ ಗಮನ ಸೆಳೆಯಿತು.