ಅಂದು ಬೇಡವೆಂದ ಸಮಿತಿಗೆ ಇಂದು ಸಮ್ಮತಿ?
34 ತಾಸು ಹೆದ್ದಾರಿ ತಡೆ, ಐದು ದಿನ ಪಾದಯಾತ್ರೆ ಬಳಿಕವೂ ಅದೇ ಭರವಸೆ |
ಹೋರಾಟದ ಹೆಚ್ಚುವರಿ ಗಳಿಕೆ ಏನೆಂಬುದಕ್ಕೆ ಬೇಕಿದೆ ಉತ್ತರ
(ಇ ಬೆಳಗಾವಿ ವಿಶೇಷ)
ಬೆಳಗಾವಿ:
ದೆಹಲಿಯಲ್ಲಿ ಒಪ್ಪದಿದ್ದ ಸಮಿತಿಯ ಪ್ರಕ್ರಿಯೆಯೇ ಹುಬ್ಬಳ್ಳಿಯ ಮಾತುಕತೆಯಲ್ಲೂ ಪರಿಹಾರದ ಮಾರ್ಗವಾಗಿ ಉಳಿದಿದ್ದರೆ, 34 ತಾಸಿನ ಹೆದ್ದಾರಿ ತಡೆ ಮತ್ತು ಸುಮಾರು ಐದು ದಿನಗಳ ಪಾದಯಾತ್ರೆಯಿಂದ ರೈತರಿಗೆ ಹೆಚ್ಚುವರಿಯಾಗಿ ದೊರೆತದ್ದೇನು?
ಕಬ್ಬು ಬೆಳೆಗಾರರ ಹೋರಾಟದ ತೀವ್ರತೆಗೂ ಸಂಧಾನದಲ್ಲಿ ದೊರೆತ ಭರವಸೆಗೂ ನಡುವಿನ ಅಂತರ ಈಗ ರೈತ ನಾಯಕತ್ವದಿಂದ ಸ್ಪಷ್ಟ ವಿವರಣೆ ಬಯಸುತ್ತಿದೆ.
ಕಬ್ಬು ಬೆಳೆಗಾರರ ಬೇಡಿಕೆಗಳ ಕುರಿತು ಚರ್ಚಿಸಲು ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ರೈತ ಸಂಘಟನೆಗಳ ನಾಯಕರನ್ನು ದೆಹಲಿಯ ಸಭೆಗೆ ಆಹ್ವಾನಿಸಿದ್ದರು. ಸಮಸ್ಯೆಗಳ ಪರಿಶೀಲನೆಗೆ ಸಮಿತಿ ರಚಿಸಿ, ಶೀಘ್ರ ವರದಿ ಪಡೆದು ಕ್ರಮ ಕೈಗೊಳ್ಳುವ ಭರವಸೆ ನೀಡಿದ್ದರು.
ಸಭೆಯಲ್ಲಿ ಪಾಲ್ಗೊಂಡಿದ್ದ ರೈತ ಮುಖಂಡ ರಾಜು ಶೆಟ್ಟಿ ಕೂಡ ಸಮಿತಿಯ ಪ್ರಸ್ತಾಪಕ್ಕೆ ಒಪ್ಪಿಗೆ ನೀಡಿದ್ದರು ಎಂದು ಜೋಶಿ ಆಗಲೇ ತಿಳಿಸಿದ್ದರು.
ಆದರೆ ಸಮಿತಿ ರಚನೆಯಾದ ಬಳಿಕವೂ ಪ್ರತಿಭಟನೆ ನಿಲ್ಲಲಿಲ್ಲ. ಮೊದಲು ಸಕ್ಕರೆಯ ಕನಿಷ್ಠ ಮಾರಾಟ ಬೆಲೆ ಹೆಚ್ಚಳದ ನಿರ್ಧಾರವಾಗಬೇಕು; ಸಮಿತಿ ನಂತರ ಎಂಬ ನಿಲುವಿನೊಂದಿಗೆ ರೈತರು ಹೋರಾಟ ಮುಂದುವರಿಸಿದರು. ಬೆಲೆಯ ಕುರಿತು ಸ್ಪಷ್ಟ ಭರವಸೆ ಸಿಗದ ಹಿನ್ನೆಲೆಯಲ್ಲಿ ಜೋಶಿ ಅವರ ನಿವಾಸದತ್ತ ಪಾದಯಾತ್ರೆ ಹೊರಟರು.
ಹೋರಾಟದ ಉದ್ದಕ್ಕೂ ಜೋಶಿ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತವಾಯಿತು. ದೆಹಲಿಗೆ ಕರೆಸಿ ಅವಮಾನಿಸಲಾಯಿತು ಎಂಬ ಆರೋಪ, ಸಮಿತಿಯಿಂದ ಪ್ರಯೋಜನವಿಲ್ಲ ಎಂಬ ಆಕ್ಷೇಪ, ಬೆಲೆ ಘೋಷಣೆಯಾಗದೆ ಹಿಂದಿರುಗುವುದಿಲ್ಲ ಎಂಬ ಪಟ್ಟು ಪ್ರತಿಭಟನೆಯ ಪ್ರಮುಖ ಧ್ವನಿಗಳಾದವು. ಜೋಶಿ ಹಾಗೂ ಕೇಂದ್ರ ಕೃಷಿ ಸಚಿವ ಶಿವರಾಜ್ ಸಿಂಗ್ ಚೌಹಾಣ್ ಅವರ ಅಣಕು ಶವಯಾತ್ರೆಯನ್ನೂ ಪ್ರತಿಭಟನಾಕಾರರು ನಡೆಸಿದರು.
ಇಷ್ಟು ತೀವ್ರ ವಿರೋಧದ ಬಳಿಕ ನಡೆದ ಸಂಧಾನದಲ್ಲಿ ಮುಂದೆ ಬಂದಿರುವುದೂ ಸಮಿತಿಯ ಮೂಲಕ ಪರಿಹಾರ ಕಂಡುಕೊಳ್ಳುವ ಪ್ರಸ್ತಾಪವೇ. ಸಮಿತಿ ಎರಡು–ಮೂರು ದಿನಗಳಲ್ಲಿ ಕಾರ್ಯಾರಂಭ ಮಾಡಲಿದೆ; ಅದರ ಮುಂದೆ ಬೇಡಿಕೆಗಳನ್ನು ಮಂಡಿಸಿ ಪರಿಹಾರಕ್ಕೆ ಪ್ರಯತ್ನಿಸಲಾಗುವುದು; ರೈತರು ಸ್ವಲ್ಪ ಸಮಯ ನೀಡಬೇಕು ಎಂದು ಜೋಶಿ ಕೋರಿದ್ದಾರೆ. ಮುಖಂಡರು ಸಭೆಯ ವಿವರಗಳನ್ನು ರೈತ ಸಮೂಹದ ಮುಂದಿಟ್ಟು ಮುಂದಿನ ನಿರ್ಧಾರ ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ.
ಹಾಗಾದರೆ ಬದಲಾದದ್ದು ಏನು?
ದೆಹಲಿಯ ಭರವಸೆಗೂ ಹುಬ್ಬಳ್ಳಿಯ ಭರವಸೆಗೂ ಇರುವ ವ್ಯತ್ಯಾಸವನ್ನು ನಾಯಕತ್ವ ವಿವರಿಸಬೇಕಾಗಿದೆ. ಸಮಿತಿಯ ಕಾರ್ಯವ್ಯಾಪ್ತಿ ಬದಲಾಗಿದೆಯೇ? ವರದಿ ಸಲ್ಲಿಕೆಗೆ ಖಚಿತ ದಿನಾಂಕ ದೊರೆತಿದೆಯೇ? ಬೆಲೆ ಹೆಚ್ಚಳದ ಕುರಿತು ಹೊಸ ಬದ್ಧತೆ ಸಿಕ್ಕಿದೆಯೇ? ಇವುಗಳಲ್ಲಿ ಸಾಧನೆಯಾಗಿರುವ ಅಂಶಗಳನ್ನು ದಾಖಲೆಯೊಂದಿಗೆ ರೈತರ ಮುಂದಿಡಬೇಕು.
ಸಂಧಾನಕ್ಕೆ ಕುಳಿತುಕೊಳ್ಳುವುದು ತಪ್ಪಲ್ಲ. ಆದರೆ ಹಿಂದೆ ತಿರಸ್ಕರಿಸಿದ ಪ್ರಕ್ರಿಯೆಗೆ ಮತ್ತೆ ಅವಕಾಶ ನೀಡುವುದಾದರೆ, ಅದನ್ನು ಒಪ್ಪಬಹುದಾದ ಸ್ಥಿತಿಗೆ ತಂದ ಹೊಸ ಷರತ್ತು ಯಾವುದು ಎಂಬುದಕ್ಕೆ ಉತ್ತರ ಬೇಕು. ಪ್ರತಿಭಟನಾ ವೇದಿಕೆಯಲ್ಲಿನ ಘೋಷಣೆಗೂ ಸಂಧಾನದ ಮೇಜಿನ ನಿಲುವಿಗೂ ಹೊಂದಾಣಿಕೆ ಇರಬೇಕಲ್ಲವೇ?
ಹೆದ್ದಾರಿ ತಡೆಯಿಂದ ಸಾರ್ವಜನಿಕರು ಸಂಕಷ್ಟ ಅನುಭವಿಸಿದರು. ರೈತರು ತಮ್ಮ ಸಮಯ, ಶ್ರಮ ವ್ಯಯಿಸಿ ಪಾದಯಾತ್ರೆಯಲ್ಲಿ ಪಾಲ್ಗೊಂಡರು.
ಈ ಎಲ್ಲದರ ಫಲವಾಗಿ ಸರ್ಕಾರದಿಂದ ಪಡೆದ ಹೆಚ್ಚುವರಿ ಬದ್ಧತೆ ಏನು ಎಂಬ ಪ್ರಶ್ನೆಯನ್ನು ಕೇವಲ ಹೋರಾಟ ವಿರೋಧವೆಂದು ತಳ್ಳಿಹಾಕಲಾಗದು. ಅದು ಹೋರಾಟದಲ್ಲಿ ಪಾಲ್ಗೊಂಡ ರೈತನಿಗೂ ಕೇಳುವ ಹಕ್ಕಿರುವ ಪ್ರಶ್ನೆ.
ಕೇಂದ್ರ ಸರ್ಕಾರವೂ ಸಮಿತಿಯ ಹಿಂದೆ ನಿಂತು ಹೊಣೆ ಮುಂದೂಡುವಂತಿಲ್ಲ. ವರದಿ ತರಿಸುವುದು, ಅದರ ಶಿಫಾರಸುಗಳ ಬಗ್ಗೆ ನಿರ್ಧರಿಸುವುದು ಮತ್ತು ರೈತರಿಗೆ ಫಲ ತಲುಪಿಸುವುದು ಸರ್ಕಾರದ ಜವಾಬ್ದಾರಿ.
ಅಂದು ಸಮಿತಿ ಬೇಡವೆಂದವರು ಇಂದು ಅದೇ ಪ್ರಕ್ರಿಯೆಗೆ ಅವಕಾಶ ನೀಡುವುದಾದರೆ ಕಾರಣ ತಿಳಿಸಬೇಕು. ಸಮಿತಿಯಿಂದ ಪರಿಹಾರ ನೀಡುತ್ತೇವೆ ಎಂದ ಸರ್ಕಾರ ಅದನ್ನು ಯಾವಾಗ ನೀಡಲಿದೆ ಎಂಬುದನ್ನು ಹೇಳಬೇಕು. ರೈತನಿಗೆ ಬೇಕಿರುವುದು ಈ ಎರಡೂ ಕಡೆಯ ಸ್ಪಷ್ಟ ಉತ್ತರ.
Comments