ಭಾರತೀಯ. ಚಿಂತನೆಯೇ ವಿಶ್ವಕ್ಕೆ‌ ದಿಕ್ಕು

ಎಸಿಪಿಆರ್‌ ಕಾರ್ಯಕ್ರಮದಲ್ಲಿ ಏಕಾತ್ಮ ಮಾನವ ದರ್ಶನ, ಗುರುದೇವ ರಾನಡೆ ತತ್ವಗಳ ಮಂಥನ.

ಬೆಳಗಾವಿ:
ಭಾರತೀಯ ಸಂಸ್ಕೃತಿ, ಆಧ್ಯಾತ್ಮಿಕತೆ ಹಾಗೂ ಏಕಾತ್ಮ ಮಾನವ ದರ್ಶನವನ್ನು ಸಮಾಜದ ಬದುಕಿನಲ್ಲಿ ಅಳವಡಿಸುವ ಅಗತ್ಯವನ್ನು ಪ್ರತಿಪಾದಿಸುವ ಮಹತ್ವದ ವೈಚಾರಿಕ ವೇದಿಕೆಯಾಗಿಯೇ ಎಸಿಪಿಆರ್‌ ಹಮ್ಮಿಕೊಂಡ ಕಾರ್ಯಕ್ರಮ ಗಮನ ಸೆಳೆಯಿತು.
ಕೇಂದ್ರ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಸಚಿವ ಗಜೇಂದ್ರಸಿಂಗ್ ಶೇಖಾವತ್ ಮಾತನಾಡಿ, “ಮುಂಬರುವ ಶತಮಾನ ಭಾರತದ್ದಾಗಲಿದೆ. ಭಾರತ ಸಮೃದ್ಧಿಯೊಂದಿಗೆ ಮತ್ತೆ ವಿಶ್ವಕ್ಕೆ ಮಾರ್ಗದರ್ಶನ ನೀಡಲಿದೆ. ಆದರೆ ಆ ನಾಯಕತ್ವ ಕೇವಲ ಆರ್ಥಿಕ ಬಲದಿಂದಲ್ಲ, ಭಾರತೀಯ ಜ್ಞಾನ, ಸಂಸ್ಕೃತಿ ಮತ್ತು ಆಧ್ಯಾತ್ಮಿಕ ಪ್ರಜ್ಞೆಯಿಂದ ರೂಪುಗೊಳ್ಳಬೇಕು” ಎಂದು ಹೇಳಿದರು.
ಮಂಗೇಶ ಭೆಂಡೆ ಅವರು ಪಂಡಿತ ದೀನದಯಾಳ್ ಉಪಾಧ್ಯಾಯರ ಏಕಾತ್ಮ ಮಾನವ ದರ್ಶನವನ್ನು ಪ್ರಸ್ತಾಪಿಸಿ, “ಮಾನವನ ಸಮಗ್ರ ಅಭಿವೃದ್ಧಿಯೇ ನಿಜವಾದ ರಾಷ್ಟ್ರಾಭಿವೃದ್ಧಿ. ದೀನದಯಾಳರ ಚಿಂತನೆಗಳನ್ನು ಸಮಾಜದ ಕೊನೆಯ ವ್ಯಕ್ತಿವರೆಗೂ ತಲುಪಿಸುವ ಕಾರ್ಯ ನಡೆಯಬೇಕು” ಎಂದು ಅಭಿಪ್ರಾಯಪಟ್ಟರು. ನಾನಾಜಿ ದೇಶಮುಖ್ ಅವರು ಈ ತತ್ವವನ್ನು ನೆಲಮಟ್ಟದಲ್ಲಿ ಕಾರ್ಯರೂಪಕ್ಕೆ ತಂದ ಮಾದರಿಯನ್ನು ಅವರು ಸ್ಮರಿಸಿದರು.
ಅರವಿಂದರಾವ್ ದೇಶಪಾಂಡೆ ಅವರು ಶಿಕ್ಷಣ ಮತ್ತು ಆಧ್ಯಾತ್ಮಿಕತೆಯ ನಡುವಿನ ಅವಿನಾಭಾವ ಸಂಬಂಧವನ್ನು ವಿವರಿಸಿ, “ಜ್ಞಾನವು ಕೇವಲ ಉದ್ಯೋಗ ಪಡೆಯುವ ಸಾಧನವಾಗಬಾರದು. ಮೌಲ್ಯ, ಮಾನವೀಯತೆ ಮತ್ತು ರಾಷ್ಟ್ರಪ್ರಜ್ಞೆ ಬೆಳೆಸುವ ಶಿಕ್ಷಣವೇ ಭಾರತದ ಭವಿಷ್ಯ ನಿರ್ಮಿಸುತ್ತದೆ” ಎಂದು ಹೇಳಿದರು.
ಕಾರ್ಯಕ್ರಮದ ಸಂಘಟನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ ಎಂ.ಬಿ. ಜಿರಲಿ ಮತ್ತು ಅವರ ತಂಡದ ಕಾರ್ಯವನ್ನು ಗಣ್ಯರು ಶ್ಲಾಘಿಸಿದರು. ಭಾರತೀಯ ತತ್ವಚಿಂತನೆಗಳನ್ನು ಅಧ್ಯಯನ, ಸಂವಾದ ಮತ್ತು ಸಮಾಜಮುಖಿ ಕಾರ್ಯಗಳ ಮೂಲಕ ಜನಜೀವನಕ್ಕೆ ತಲುಪಿಸುವ ಎಸಿಪಿಆರ್‌ನ ಪ್ರಯತ್ನ ಅಭಿನಂದನೀಯ ಎಂದು ಹೇಳಿದರು.
ರಾಜ್ಯಸಭಾ ಸದಸ್ಯ ಈರಣ್ಣ ಕಡಾಡಿ‌ ಮಾತನಾಡಿದರು.
ಚಿಂತಕ ಅತುಲ್ ಜೈನ್ ಬೆಳಗಾವಿಯನ್ನು ತಮ್ಮ “ಎರಡನೇ ಮನೆ” ಎಂದು ಬಣ್ಣಿಸಿ, “ಇಲ್ಲಿನ ಜನರು ಭಾರತೀಯ ತತ್ವಗಳನ್ನು ಕೇವಲ ಮಾತನಾಡುವುದಿಲ್ಲ; ಬದುಕಿನಲ್ಲಿ ಅನುಷ್ಠಾನಗೊಳಿಸುತ್ತಾರೆ” ಎಂದರು.
ಒಟ್ಟಾರೆ, ಗುರುದೇವ ರಾನಡೆ ಅವರ ಆಧ್ಯಾತ್ಮಿಕ ಚಿಂತನೆ ಮತ್ತು ದೀನದಯಾಳರ ಏಕಾತ್ಮ ಮಾನವ ದರ್ಶನವೇ ಸಮೃದ್ಧ, ಮೌಲ್ಯಾಧಾರಿತ ಭಾರತದ ನಿರ್ಮಾಣಕ್ಕೆ ದಾರಿದೀಪ ಎಂಬ ಸಂದೇಶ ಕಾರ್ಯಕ್ರಮದಿಂದ ಹೊರಹೊಮ್ಮಿತು.