ಬೆಳಗಾವಿಗೆ ಎರಡು ಕುರ್ಚಿ; ಮೂವರಿಗೆ ನಿರಾಸೆ!

ಬೆಳಗಾವಿ: ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ನೇತೃತ್ವದ ಸಚಿವ ಸಂಪುಟ ವಿಸ್ತರಣೆ ಬೆಳಗಾವಿ ಜಿಲ್ಲೆಯ ಕಾಂಗ್ರೆಸ್ ವಲಯದಲ್ಲಿ ಸಂಭ್ರಮಕ್ಕಿಂತ ಹೆಚ್ಚು ರಾಜಕೀಯ ಚರ್ಚೆಗೆ ಕಾರಣವಾಗಿದೆ. ಜಿಲ್ಲೆಯ ಹಿರಿಯ ಶಾಸಕ ಅಶೋಕ ಪಟ್ಟಣ ಹಾಗೂ ಬೈಲಹೊಂಗಲ ಶಾಸಕ ಮಹಾಂತೇಶ ಕೌಜಲಗಿ ಅವರಿಗೆ ಸಚಿವ ಸ್ಥಾನ ಸಿಗಲಿದೆ ಎಂಬ ನಿರೀಕ್ಷೆ ಕೊನೆಯ ಕ್ಷಣದವರೆಗೂ ಜೀವಂತವಾಗಿತ್ತು. ಇನ್ನೊಂದೆಡೆ, ಹಿಂದಿನ ಸರ್ಕಾರದಲ್ಲಿ ಸಚಿವೆಯಾಗಿ ಕಾರ್ಯನಿರ್ವಹಿಸಿದ್ದ ಲಕ್ಷ್ಮೀ ಹೆಬ್ಬಾಳ್ಕರ್, ಡಿ.ಕೆ. ಸಂಪುಟದಲ್ಲೂ ಮತ್ತೊಂದು ಅವಕಾಶ ಸಿಕ್ಕೇ ಸಿಗುತ್ತದೆ ಎಂಬ ವಿಶ್ವಾಸದಲ್ಲಿದ್ದರು. ಆದರೆ ಅಂತಿಮ ಪಟ್ಟಿ ಮೂವರ ಲೆಕ್ಕವನ್ನೂ ತಲೆಕೆಳಗಾಗಿಸಿದೆ.
ರಾಮದುರ್ಗ ಶಾಸಕ ಅಶೋಕ ಪಟ್ಟಣ ಅವರಿಗೆ ಹಿರಿಯತೆ, ಪಕ್ಷನಿಷ್ಠೆ ಮತ್ತು ದೀರ್ಘ ರಾಜಕೀಯ ಅನುಭವವೇ ಪ್ರಮುಖ ಬಲವಾಗಿತ್ತು. ಸಚಿವ ಸ್ಥಾನದ ಆಕಾಂಕ್ಷೆಯನ್ನು ಅವರು ಬಹಿರಂಗವಾಗಿಯೇ ಹೇಳಿಕೊಂಡಿದ್ದರು. ಪಕ್ಷದ ಸಂಕಷ್ಟದ ಸಂದರ್ಭಗಳಲ್ಲಿ ಜೊತೆ ನಿಂತವರನ್ನು ಹೈಕಮಾಂಡ್ ಕೈಬಿಡುವುದಿಲ್ಲ ಎಂಬ ನಂಬಿಕೆಯೂ ಅವರಲ್ಲಿತ್ತು. ಆದರೆ ಹೊಸ ಮುಖಗಳು, ಸಾಮಾಜಿಕ ಸಮೀಕರಣ ಮತ್ತು ಮುಂದಿನ ಚುನಾವಣೆಯ ಲೆಕ್ಕಾಚಾರಕ್ಕೆ ಆದ್ಯತೆ ನೀಡಿದ ಕಾಂಗ್ರೆಸ್ ನಾಯಕತ್ವ ಪಟ್ಟಣ ಅವರ ಹಿರಿಯತೆಯನ್ನು ಪರಿಗಣಿಸಲಿಲ್ಲ.
ಬೈಲಹೊಂಗಲದ ಮಹಾಂತೇಶ ಕೌಜಲಗಿ ಹೆಸರು ಕೂಡ ಜಿಲ್ಲೆಯ ಕೋಟಾದಲ್ಲಿ ಗಂಭೀರವಾಗಿ ಕೇಳಿಬಂದಿತ್ತು. ಮಿತಭಾಷಿ ರಾಜಕಾರಣ, ವಿವಾದಗಳಿಂದ ದೂರ ಉಳಿದ ನಡೆ ಮತ್ತು ಕ್ಷೇತ್ರದ ಮೇಲಿನ ಹಿಡಿತ ಅವರ ಪರವಾಗಿದ್ದವು. ಲೋಕೋಪಯೋಗಿ ಸಚಿವ ಸತೀಶ್ ಜಾರಕಿಹೊಳಿ ಅವರು ಕೌಜಲಗಿ ಹಾಗೂ ಪಟ್ಟಣ ಪರವಾಗಿ ಒತ್ತಡ ತಂದಿದ್ದಾರೆ ಎಂಬ ಮಾತು ಕಾಂಗ್ರೆಸ್ ಅಂಗಳದಲ್ಲಿತ್ತು. ಆದರೂ ಅಂತಿಮವಾಗಿ ಅಥಣಿಯ ಲಕ್ಷ್ಮಣ ಸವದಿ ಸಂಪುಟ ಪ್ರವೇಶಿಸಿರುವುದು, ಬೆಳಗಾವಿಯ ವಿಷಯದಲ್ಲಿ ಹೈಕಮಾಂಡ್ ಪ್ರತ್ಯೇಕ ರಾಜಕೀಯ ಲೆಕ್ಕ ಹಾಕಿದೆ ಎಂಬುದನ್ನು ಸ್ಪಷ್ಟಪಡಿಸಿದೆ.
ಲಕ್ಷ್ಮೀ ಹೆಬ್ಬಾಳ್ಕರ್ ಅವರ ನಿರಾಸೆಯ ಸ್ವರೂಪವೇ ಬೇರೆ. ಡಿ.ಕೆ. ಶಿವಕುಮಾರ್ ನಾಯಕತ್ವಕ್ಕೆ ಆಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದ ಅವರು, ಹೊಸ ಸರ್ಕಾರದಲ್ಲೂ ತಮ್ಮ ಸ್ಥಾನ ಭದ್ರವೆಂದೇ ನಂಬಿದ್ದರು. ಹಿಂದಿನ ಸಚಿವ ಅನುಭವ, ಮಹಿಳಾ ನಾಯಕತ್ವ, ಕ್ಷೇತ್ರದ ಸಂಘಟನಾ ಬಲ ಹಾಗೂ ರಾಜ್ಯಮಟ್ಟದ ರಾಜಕೀಯ ಸಂಪರ್ಕಗಳು ಅವರ ಪರವಾಗಿದ್ದವು. ಆದರೂ ಕಾಂಗ್ರೆಸ್ ಹೈಕಮಾಂಡ್ ಹಿಂದಿನ ಸಂಪುಟದಲ್ಲಿದ್ದ ಹಲವು ಹಿರಿಯರನ್ನು ಕೈಬಿಟ್ಟು ಹೊಸ ತಂಡ ಕಟ್ಟಲು ಮುಂದಾಯಿತು. ಮಹಿಳಾ ಕೋಟಾದಲ್ಲಿಯೂ ಹೊಸ ಮುಖಕ್ಕೆ ಅವಕಾಶ ನೀಡಿದ್ದರಿಂದ ಹೆಬ್ಬಾಳ್ಕರ್ ಅವರ ನಿರೀಕ್ಷೆ ಹುಸಿಯಾಯಿತು.
ಜಿಲ್ಲೆಗೆ ಸತೀಶ್ ಜಾರಕಿಹೊಳಿ ಮತ್ತು ಲಕ್ಷ್ಮಣ ಸವದಿ ರೂಪದಲ್ಲಿ ಎರಡು ಪ್ರಭಾವಿ ಸ್ಥಾನಗಳು ದೊರೆತಿದ್ದರೂ, ಪಟ್ಟಣ–ಕೌಜಲಗಿ ಹೊರಗುಳಿದಿರುವುದು ಸತೀಶ್ ಶಿಬಿರಕ್ಕೂ ಹಿನ್ನಡೆಯೆಂದೇ ವಿಶ್ಲೇಷಿಸಲಾಗುತ್ತಿದೆ. ಹೆಬ್ಬಾಳ್ಕರ್ ಅವರನ್ನು ಸಂಪುಟದಿಂದ ದೂರವಿಟ್ಟಿರುವುದು ಡಿ.ಕೆ. ಶಿವಕುಮಾರ್ ಅವರಿಗೂ ಸುಲಭದ ರಾಜಕೀಯ ನಿರ್ಧಾರವಾಗಿರಲಿಕ್ಕಿಲ್ಲ.
ಒಟ್ಟಿನಲ್ಲಿ ಇದು ಮೂವರಿಗೆ ಸಚಿವ ಸ್ಥಾನ ಕೈತಪ್ಪಿದ ಸಾಮಾನ್ಯ ಘಟನೆಯಲ್ಲ. ಬೆಳಗಾವಿ ಕಾಂಗ್ರೆಸ್‌ನ ಶಕ್ತಿಕೇಂದ್ರಗಳು ಮರುಹಂಚಿಕೆಯಾಗುತ್ತಿರುವ ಸೂಚನೆ. ಪಟ್ಟಣ ಮತ್ತು ಕೌಜಲಗಿ ಅವರಿಗೆ ಮುಂದಿನ ದಿನಗಳಲ್ಲಿ ನಿಗಮ–ಮಂಡಳಿ ಅಥವಾ ಪಕ್ಷ ಸಂಘಟನೆಯಲ್ಲಿ ಸ್ಥಾನ ನೀಡಿ ಸಮಾಧಾನಪಡಿಸುವ ಸಾಧ್ಯತೆ ಇದ್ದರೆ, ಹೆಬ್ಬಾಳ್ಕರ್ ಅವರಿಗೆ ತಮ್ಮ ರಾಜಕೀಯ ಪ್ರಭಾವವನ್ನು ಹೊಸದಾಗಿ ಸಾಬೀತುಪಡಿಸಬೇಕಾದ ಸವಾಲು ಎದುರಾಗಿದೆ.